ភ្នំពេញ: ក្រុមកម្មកររោងចក្រកាត់ដេរ SL ដែលមានទីតាំងតាមផ្លូវលេខ ៣៧១ ក្នុងខណ្ឌមានជ័យ បានដើរហែក្បួនជាថ្មី នៅព្រឹកថ្ងៃទី២៧កញ្ញានេះ ក្នុងបំណងទៅកាន់ផ្ទះសម្តេចហ៊ុនសែន នៅជិតវិមានឯករាជ្យ ដើម្បីដាក់ញត្តិ។ ប៉ុន្តែមកដល់ក្បាលថ្នល់ ចំណុចច្រមុះជ្រូក ក្បួនកម្មករ ត្រូវបានសមត្ថកិច្ចរារាំង។ មានតែតំណាងកម្មករ ៣០ នាក់ប៉ុណ្ណោះ ត្រូវបានអនុញ្ញាតឲ្យយកញត្តិ ទៅដាក់នៅខុទ្ទកាល័យសម្តេចនាយករដ្ឋមន្ត្រី ហ៊ុន សែន។ ក្រុមកម្មកររោងចក្រកាត់ដេរ SL ស្វែងរកអន្តរាគមន៍ពីសម្តេចហ៊ុនសែន ដើម្បីឲ្យដោះស្រាយលើបញ្ហាប្រាក់ឈ្នួលកម្មករ និងការទាមទារបញ្ឈប់ប្រធានរដ្ឋបាលរោងចក្រ ព្រមទាំងជម្លោះថ្មីៗ ដែលកើតជាហិង្សា ក្នុងរោងចក្រ កាលពីសប្តាហ៍មុន។ លោក អាត់ ធន់ ប្រធានសហជីពកម្មករ ស៊ីខាវឌូ បានបញ្ជាក់ថា ក្នុងពេលដែលសមត្ថកិច្ចរារាំងកម្មករនៅក្បាលថ្នល់ នាព្រឹកមិញ ស្ទើរតែកើតជម្លោះហិង្សាធ្ងន់ធ្ងរទៅហើយ ប៉ុន្តែដោយសារតែមានការចរចាត្រូវរ៉ូវគ្នា ទើបក្រុមកម្មករកាត់ដេររាប់រយនាក់ បានសម្រេចចិត្តរំសាយទៅវិញ ដោយឲ្យតំណាងតែ ៣០ នាក់ យកញត្តិទៅដាក់នៅខុទ្ទកាល័យសម្តេចនាយករដ្ឋមន្ត្រី ហ៊ុន សែន នៅជិតវិមានឯករាជ្យ។ លោក អាត់ ធន់ បន្តថា ក្នុងញត្តិនោះ ក្រុមកម្មករ នៅតែទទូចស្នើសុំដល់សម្តេចហ៊ុនសែន អន្តរាគមន៍ ដកលោក មាស សុថា ប្រធានរដ្ឋបាលរោងចក្រកាត់ដេរ SL រួមទាំងកងកម្លាំងប្រដាប់អាវុធ ចេញពីរោងចក្រកាត់ដេរ ព្រមទាំងទាមទារឲ្យរោងចក្រ ផ្តល់ប្រាក់ឈ្នួលដល់កម្មករ ក្នុងអំឡុងពេលកូដកម្មតវ៉ា តាមការសម្រេច ក្រោយពីកិច្ចចរចា សម្របសម្រួលរវាងតំណាងរោងចក្រកាត់ដេរ សហជីពកម្មករ និងអភិបាលរាជធានីភ្នំពេញ កាលពីខែមុន៕
.jpg)
.jpg)
.jpg)
.jpg)
កម្មកររោងចក្រកាត់ដេរ SL ហែក្បួន ស្វែងរកអន្តរាគមន៍ពីសម្តេចហ៊ុនសែន
