ការសរសេរបកអាក្រាតរឿងរ៉ាវជីវិតដ៏អាម៉ាសរបស់ពិធីករវ័យ ក្មេងរូបសង្ហាលោក សាយ រតនៈ ជាសាធារណៈធ្វើឲ្យរំជួលដល់ប្រិយមិត្តក្នុងហ្វេសប៊ុកនោះត្រូវបាន ធ្វើឡើងនៅក្នុងបណ្តាញសង្គមហ្វេសប៊ុកមួយ ដែលមានគណនេយ្យឈ្មោះ សាយ រតនៈ (Say Ratanak) ។ តែគណនេយ្យហ្វេសប៊ុកនោះត្រូវបានពិធីករវ័យក្មេង សាយ រតនៈ បញ្ជាក់ថា ជាគណនេយ្យក្លែងក្លាយប៉ុណ្ណោះ គណនេយ្យហ្វេសប៊ុកពិតរបស់លោក គឺ Say Rattanak (សាយ រតនៈ) ។
នៅលើគណនេយ្យក្លែងក្លាយដែលអ្នកសរសេរ ត្រូវគេដឹងថាជានារីម្នាក់នោះបានសរសេរលាតត្រដាងយ៉ាងឈឺចាប់ មិនខ្លាចអាម៉ាស់ខ្លួនឯងថា៖«អាឆែ្ក សាយ រតនៈ ខ្ញុំសិក្សានៅសាលា NUM ជិតវត្តភ្នំ គេបានទាក់ទងខ្ញុំជាសង្សាររហូតបានប្រាណខ្ញុំ គ្មានសល់រយៈពេល១ឆ្នាំ ខ្ញុំមានកូនជាមួយគេ គេឲ្យខ្ញុំទម្លាក់កូនចោល ហើយមានស្រីថ្មី។ ខ្ញុំគេបោះបង់ចោល កូនក៏ទម្លាក់ ជីវិតខ្ញុំគ្មានន័យទៀតទេ រស់ដូចស្លាប់ ការស្បថស្បែ និងការលួងលោមគេ ពិតជានឹកស្មានមិនដល់សោះ ខ្ញុំស្តាយក្រោយណាស់ ស្លាប់កូនម្នាក់ទៀតដោយសារតាមគេ ស្រលាញ់គេពេក គេរៀបការជាមួយអ្នកដទៃ ចោលខ្ញុំ ឈឺចាប់បំផុតសម្រាប់ខ្ញុំ what should I do with my life ? កាត់តរូបថតគេហត់នឿយណាស់រាប់ម៉ោង តែចង់ឲ្យពិភពលោកដឹងថា គេជាមនុស្ស បោះបង់ខ្ញុំចោល រស់គ្មានន័យទេ ស្តាយក្រោយណាស់ សូមជួយឲ្យយោបល់ផង បង បង»។
ការបកអាក្រាតរបស់នារីម្នាក់នេះ ត្រូវបានគេមើលឃើញថាជារឿងក្លាហានមួយដែលនាងហ៊ានដើរកាត់ កេរ្តិ៍កាត់ខ្មាសក្នុងនាមជាស្រីស្ថិតក្នុងវ័យសិក្សាម្នាក់ ចេញមុខមកបកអាក្រាតបុរសម្នាក់ដែលផ្អែមតែសម្តី តែចិត្តអប្រិយមិនទទួលខុសត្រូវលើទង្វើខ្លួនឯងនោះ។ តែយ៉ាងណាទស្សនិកជនមួយចំនួនក៏មិនទាន់ជឿនូវសម្តីនារីអាណាមិក ម្នាក់នេះនៅឡើយ ខណៈដែលគណនេយ្យហ្វេសប៊ុកនោះមិនបានបង្ហាញរូបថតរបស់នាង តែបែរជាដាក់រូបថតរបស់ពិធីករលោក រតនៈ ទៅវិញ។ គេជឿថា នោះអាចជាករណីដែលអ្នកណាម្នាក់មានបំណងមួលបង្កាច់កេរ្តិ៍ឈ្មោះ ឬក៏កិត្តិយសរបស់លោក រតនៈ ខណៈមុននេះការវាយប្រហារតាមរយៈការកាត់តរូបថតរបស់ពិធីកររូប នេះត្រូវបានគេធ្វើម្តងរួចមកហើយនោះ។
គួរបញ្ជាក់ថា នេះជាលើកទី២ហើយ បន្ទាប់ពីកាលពីប្រមាណ២សប្តាហ៍មុន ពិធីករនៅក្នុងកម្មវិធី «រាត្រីកម្សាន្ត» លោក សាយ រតនៈ ត្រូវបានគេកាត់តរូបថតបែបអាសអាភាសរបស់លោកជាច្រើនសន្លឹកបង្ហោះ នៅលើហ្វេសប៊ុកផងដែរ ដែលពេលនោះលោក សាយ រតនៈ ក៏បានចេញមុខបកស្រាយម្តងរួចមកហើយ តែមិនទាន់នឹងស្ងប់ស្ងាត់ស្រួលបួលផង រឿងថ្មីដ៏អាក្រក់នេះក៏បានកើតឡើងជាថ្មីម្តងទៀត។
ពាក់ព័ន្ធនឹងការវាយប្រហារលើបណ្តាញសង្គមនេះ ពិធីករដែលកំពុងរុំគួនដោយរឿងអាស្រូវស្នេហ៍ សាយ រតនៈ បានឲ្យដឹងថា នោះជាការមួលបង្កាច់បង្ខូចកិត្តិយស កេរ្តិ៍ឈ្មោះរបស់លោកទាំងស្រុង ខណៈរូបលោកមិនដែលជាប់ពាក់ព័ន្ធ ឬស្គាល់និស្សិតស្រីណាម្នាក់នៅសាកលវិទ្យាល័យជាតិគ្រប់គ្រង ឬ NUM នោះទេ តែលោកចាប់អារម្មណ៍ថា មនុស្សដែលមានបំណងបំបាក់កិត្តិយសរបស់លោកនោះមិនមែនមនុស្សស្រី ឡើយ ពោលគឺជាមនុស្សប្រុសក្លែងធ្វើស្រី។
តារាដែលអះអាងថា ខ្លួនជាអ្នកប្រកាន់ខ្ជាប់ខ្ជួននូវធម៌ព្រះពុទ្ធ រូបនេះបាននិយាយថា៖«ខ្ញុំសូមអះអាងថា នោះជាបង្ខូចកេរ្តិ៍ឈ្មោះខ្ញុំទាំងអស់ ខ្ញុំអត់ដែលទាក់ទងនិស្សិតស្រីនៅ Num ណាម្នាក់ទេ។ ខ្ញុំជាអ្នកមានធម៌ព្រះក្នុងខ្លួនម្នាក់ ខ្ញុំហ៊ានអះអាងថា អ្នកធ្វើរឿងនេះគឺជាមនុស្សប្រុស តែក្លែងធ្វើស្រី ហើយគេចាប់ផ្តើមវាយប្រហារខ្ញុំនៅក្រោយពេលការបោះឆ្នោតមួយថ្ងៃ គឺថ្ងៃទី២៩»។
លោកបានបញ្ជាក់ថា៖«ការមួលបង្កាច់កិត្តិយសខ្ញុំរបស់ជននោះ គឺអាចមានកត្តាពីរ ទី១ គឺពាក់ព័ន្ធនឹងរឿងនយោបាយ គឺគេប្រហែលជាខឹងនឹងការអធិប្បាយរបស់ខ្ញុំនៅលើទូរទស្សន៍ពាក់ ព័ន្ធនឹងនយោបាយតិចតួច ហើយទី២គឺ ការច្រណែនឈ្នានីសនៅក្នុងការងារ ដូចជាវិស័យសិល្បៈជាដើម តែខ្ញុំអត់ដែលមានបញ្ហាប៉ះពាល់លើសលុះជាមួយនឹងអ្នកណាម្នាក់ឡើយ ដូច្នេះហើយសូមកុំមានការយល់ច្រឡំ»។
ជាថ្មីម្តងទៀត ពិធីករដៃគូជីជី និង គង់ វង្សយ៉ាទី លោក សាយ រតនៈ នៅតែអះអាងថា ខ្លួនមិនធ្វើរឿងអាក្រក់ហួសនិស្ស័យដូចគេសរសេរលើហ្វេសប៊ុកឡើយ ដោយនិយាយថា៖«អ្នកដែលមានបំណងធ្វើបាបខ្ញុំនោះ គេអត់បានស្គាល់ខ្ញុំច្បាស់ទេថា ខ្ញុំជាអ្នកណា មកពីណា រៀនអ្វីធ្វើអ្វីនោះ គឺចេះតែសរសេរប៉ាតណាប៉ាតណី ហើយថាខ្ញុំរៀបការប្រពន្ធ គឺគេច្រឡំទាំងស្រុងនៅពេលខ្ញុំថតរូបបង្ហោះនៅពេលថតរឿងជាមួយ កែវ នីសា កាលពីពេលថ្មីៗនេះ»។
ធម៌ខន្តីជារឿងសំខាន់បំផុតក្នុងការដោះស្រាយបញ្ហា ដូច្នេះហើយបានជាពិធីករដ៏មានប្រជាប្រិយជំនាន់ក្រោយរូបនេះបាន ឲ្យដឹងថា រូបលោកមិនទាន់មានវិធានការអ្វីលើការប្រមាថដ៏ធ្ងន់ធ្ងរនេះទេ តែលោកសុំព្រមានថា បើសិនជាអ្នកប្រព្រឹត្តរឿងនេះនៅតែបន្តរូបលោកនឹងធ្វើទៅតាម និតិវិធីនៃច្បាប់។
ជាចុងក្រោយ សាយ រតនៈ បាននិយាយថា៖«សម្រាប់រឿងនេះ ខ្ញុំសូមឲ្យទស្សនិកជនទាំងអស់មានការយល់យោគ និងយល់ថា រូបខ្ញុំមិនមែនមនុស្សធ្វើឲ្យប៉ះពាល់រឿងកាមគុណបែបនេះទេ ដូច្នេះសុំកុំឲ្យមានការយល់ច្រឡំទៀត»៕
ប្រភពអត្ថបទ៖PostKhmer
សាយ រតនៈ បកស្រាយការចោទប្រកាន់របស់និស្សិតស្រីម្នាក់ថាធ្វើឲ្យនាងមានផ្ទៃពោះ រួចបោះបង់ខ្លួនចោល
