ខេត្តបាត់ដំបង ៖ សមត្ថកិច្ចនគរបាល ស្រុកឯកភ្នំបានឃាត់ខ្លួន បុរសម្នាក់ជាកម្មករសំណង់ បន្ទាប់ពីស្រវឹងមកដល់ផ្ទះ ស្រែកឡូឡាហើយពេលប្រពន្ធ ស្តីបន្ទោសខ្លាចខ្មាស់អ្នកស្រុក ក៏កើតក្តីមួរម៉ៅ និយាយច្រំដែលរករឿង វាយប្រពន្ធ ចំនួន ៤ ខ្នងពូថៅ និងកាប់មួយពូថៅ ចំកណ្តាលខ្នង បណ្តាលឲ្យរបួសជាទម្ងន់ កាលពីវេលាម៉ោង ៨និង៤០ នាទីយប់ថ្ងៃទី២៥ ខែកញ្ញាឆ្នាំ២០១៣ នៅចំណុចសំបុកចាប ស្ថិតក្នុងក្រុមទី៨ ភូមិព្រែកតាច្រែង ឃុំព្រែកនរិន្ទ ស្រុកឯកភ្នំខេត្តបាត់ដំបង។
ជនរងគ្រោះជាប្រពន្ធមានឈ្មោះ ជឹម សុខឡី អាយុ ២៥ ឆ្នាំ បន្ទាប់ពីត្រូវប្តីកំណាច វាយជាច្រើនខ្នងពូថៅ បានឱបបីកូនតូចរត់ចេញពីផ្ទះ រកអ្នកឲ្យស្រុកជួយ។ ជនសង្ស័យដែលត្រូវសមត្ថកិច្ចឃាត់ខ្លួន មានឈ្មោះ ញឹម សុខន អាយុ ២៨ ឆ្នាំជាកម្មករសំណង់ និងជាប្តីជនរងគ្រោះ ដោយដកហូតវត្ថុតាង បានពូថៅដងឈើចំនួន១។ ជនសង្ស័យត្រូវ សមត្ថកិច្ចនគរបាល បញ្ជូនទៅកាន់តុលាការ កាលពីព្រឹកថ្ងៃទី២៧ ខែកញ្ញាឆ្នាំ២០១៣ ចាត់ការតាមនីតិវិធី។
ឈ្មោះ ជឹម សុខឡី បានប្រាប់សមត្ថកិច្ចថា នៅម៉ោងប្រហែល ៨ យប់ថ្ងៃទី២៥ ខែកញ្ញា ឆ្នាំ២០១៣ ពេលប្តីត្រឡប់ពីធ្វើសំណង់វិញ មានអាការៈស្រវឹង ចូលដល់ផ្ទះភ្លាម ស្រែកឡូឡាហើយខ្លួនបានស្តីបន្ទោស កុំឲ្យឡូឡាខ្មាស់អ្នកស្រុក។ ពេលនោះប្តីខឹង បានទាញពូថៅដងឈើ វាយក្បាលខ្លួន មួយខ្នងពូថៅ ហើយគំរាមមិនឲ្យស្រែក ពេលនោះដោយសារឈឺពេកនាងបានយំ ហើយកូនតូចអាយុ ១ ឆ្នាំក៏វាយំខ្លាំងផងដែរ។
ភ្លាមនោះប្តីក៏វាយក្បាលខ្លួន ចំនួន ៣ ខ្នងពូថៅទៀត ហើយសំឡុតឲ្យ លួងកូនអាយុ១ឆ្នាំឲ្យឈប់យំ ។ តែដោយកូនមិនបាត់យំ ប្តីកំណាចក៏បានកាប់ប្រពន្ធ ចំកណ្តាលខ្នង ១ ពូថៅថែមទៀត រួចប្តីបានទៅងូតទឹកបាត់។ ឆ្លៀតឱកាសល្អស្ត្រីជាប្រពន្ធ បានបីកូនចុះពីផ្ទះ ប៉ះនឹងពូថៅមុតចំជង្គង់ខាងឆ្វេង មួយកន្លែងទៀត ហើយរត់រកអ្នកស្រុក ឲ្យជួយតែម្តង។
បុរសសង្ស័យ បានសារភាពថា ពេលចប់ការងារ ខ្លួនបានទិញស្រាស ២,៥ លីត្រផឹកជាមួយមិត្តភ័ក្តិ។ ពេលផឹករួច ទៅដល់ផ្ទះប្រពន្ធ ស្តីបន្ទោសរករឿង ហើយនិយាយពាក្យច្រំដែលៗ ច្រើនដងពេក ខ្លួនខឹងបានទាញពូថៅ វាយក្បាលនាង ១ ខ្នងពូថៅ ហើយសំឡុតមិនឲ្យស្រែក តែនាងនៅតែស្រែក ក៏យកពូថៅវាយក្បាលថែម ៣ ខ្នងពូថៅទៀត បន្ទាប់មកកាប់នាងចំខ្នង ១ ពូថៅ ហើយនាងបានបីកូន ទៅផ្ទះអ្នកជិតខាងបាត់តែម្តង៕
មកពីផឹកស៊ីស្រវឹងស្រែកអាឡូអាឡា វាយនិងកាប់ប្រពន្ធ ៥ ពូថៅរបួសធ្ងន់
