បន្ទាយមានជ័យ: ទឹកជំនន់ធ្លាក់ពីថៃ បានប៉ះពាល់ដល់មណ្ឌលត្រូវប្រលងឌីប្លូម ធ្វើអោយបេក្ខជន/នារី និងគណៈមេប្រយោគប្រលងសញ្ញាប័ត្រមធ្យមសិក្សាបឋមភូមិ ដែលត្រូវបំពេញការងារ ដែលប្រព្រឹត្តទៅថ្ងៃទី២៦-២៧កញ្ញា ២០១៣ សម្រាប់នៅខេត្តបន្ទាយមានជ័យ។ ការប្រលងបានជួបផលវិបាកដោយសារទឹកជំនន់ ប៉ះពាល់មណ្ឌលប្រលង ធ្វើអោយសិស្សជួបផលវិបាក ឆ្លងកាត់សើមខ្លួនប្រាណ ពិបាកអង្គុយប្រលង។ នេះជាទិដ្ឋភាពនៅវិទ្យាល័យកូប។ បេក្ខជន/នារី សិស្សចំណេះទូទៅត្រូវប្រលងសញ្ញាប័ត្រមធ្យមសិក្សាបឋមភូមិ (ឌីប្លូម) នៅមណ្ឌលវិទ្យាល័យហ៊ុនសែនមង្គលបូរី , វិទ្យាល័យមង្គលបូរី ស្រុកមង្គលបូរី , វិទ្យាល័យសិរីសោភ័ណ និងវិទ្យាល័យសម្ដេចឪ ក្រុងសិរីសោភ័ណ និយាយប្រាប់គេហទំព័រ CEN ស្រដៀងគ្នាថា: ទើបដឹងនៅរសៀលថ្ងៃទី២៥ កញ្ញាថា ការប្រលងត្រូវលើកពេលពីថ្ងៃទី២៦-២៧ កញ្ញា គឺជួបផលប៉ះពាល់ដោយសារទឹកជំនន់ទឹកភ្លៀងធ្លាក់ពីថៃ នាំអោយសិស្សជួបផលវិបាក ជិះម៉ូតូ កង់ខ្លះ ជិះគោយន្ត ដោយសារការធ្វើដំណើរថ្មើរជើងមិនទាន់ពេលវេលាប្រលង។ ឯលោកគ្រូ/អ្នកគ្រូ ជាគណៈមេប្រយោគវិញ និយាយថា គាត់ជួបផលវិបាកយ៉ាងខ្លាំង ដោយសារគាត់ចុះពីថ្នល់ជាតិជិះម៉ូតូ ឬដើរទៅមណ្ឌលប្រលង ពិបាកលើកសំពត់ខោ ខំធ្វើខ្លួនមកពីផ្ទះមកដល់មណ្ឌលប្រលង ប្រឡាក់ទឹកអស់ មានការសោកស្ដាយណាស់ ក្នុងការធ្វើគណៈមេប្រយោគគ្រប់ថ្នាក់ និងស្ទើរគ្រប់មុខតំណែង ដែលត្រៀមចូលរួមក្នុងដំណើរការវិញ្ញាសាប្រលងក្នុងមណ្ឌលសំនេរ (ពេលសិស្សប្រលង) លើកលែងតែគណៈមេប្រយោគ ជាអ្នកធ្វើកំណែបែងចែកសន្លឹកកិច្ចការ , បូកស្រង់-គូសជាប់ធ្លាក់នៃដំណើរការមណ្ឌលកំណែ គឺបានរិះគន់ការលើកពេលនេះយ៉ាងប្រថុចញ៉ុច គឺ ដំណឹងបានដឹងសុះសាយនៅតែប៉ុន្មាននាទីមុនការប្រជុំគណៈមេប្រយោគនៅល្ងាចថ្ងៃទី២៥ កញ្ញា ដំណើរការ។ ក្រុមសិស្សត្រូវប្រលងឌីប្លូម និយាយថា: ទឹកលិចយ៉ាងណាក៏ដោយ ពួកគេក៏តស៊ូទ្រាំឆ្លងកាត់ទាំងរអិលជើង ប្រឡាក់ភក់ទទឹកខោអាវ ក៏ត្រូវតែដើរមកប្រលងអោយបានសញ្ញាបត្របន្តទៅរៀនទៅមុខទៀតដែរ មិនថាជិះម៉ូតូជិះគោយន្តដើរឆ្លងកាត់ទឹកហូរយ៉ាងណា ក៏ស៊ូទ្រាំអោយបានចប់រយៈពេល២ថ្ងៃនេះដែរ។ ពួកគាត់ឆ្លើយថា បើប្រលងតាំងពីថ្ងៃទី១៦ ខែកញ្ញា ជួបបញ្ហាបាតុកម្មមកដល់ថ្ងៃទី២៦ ជួបបញ្ហាទឹកជំនន់ ដែលបានធ្លាក់មកពីប្រទេសថៃ ធ្វើអោយការប៉ះពាល់ដល់សាលាជាច្រើន ដែលជាប់ព្រំដែនថៃ ត្រូវបានទឹកលិច ជាពិសេសមណ្ឌលប្រលងសញ្ញាបត្របឋមសិក្សាបឋមភូមិ ធ្វើអោយគណៈមេប្រយោគអនុរក្សកាន់វិញ្ញាសាប្រលង ជួបផលវិបាកខ្លាចរអិលជើង និងប៉ះពាល់ដល់វិញ្ញាសា។ លោក ឈើយ ចាន់ណា ប្រធានមន្ទីរអប់រំ យុវជននិងកីឡាខេត្តបន្ទាយមានជ័យ បានអោយដឹងថា: ខេត្តនេះសម្រាប់ប្រលងឌីប្លូមឆ្នាំនេះ មានមណ្ឌលប្រលង ២១ មណ្ឌល មានបេក្ខជន/នារី ចំនួន ៤.៨៦៨ នាក់ (ស្រី២.៤៩៦នាក់) មណ្ឌលមួយចំនួនរងគ្រោះដោយសារទឹកជំនន់ទឹកភ្លៀង ធ្លាក់មកពីប្រទេសថៃ ធ្វើអោយគណៈមេប្រយោគដែលត្រូវប្រលងឆ្នាំនេះ ជួបផលវិបាកខ្លាំងណាស់ ទាំងធ្វើដំណើរទៅធ្វើមេប្រយោគ ជាពិសេសចាប់ពីក្រុងសិរីសោភ័ណ ទៅថ្មពួក ផលវិបាកផ្លូវភ្លៀងម្ដងៗ ជិះម៉ូតូជិះឡានពិបាកដែរ។ មណ្ឌលប្រលង ដែលប៉ះពាល់នឹងទឹកជំនន់នៅវិទ្យាល័យកូប ក្រុងប៉ោយប៉ែត គឺមណ្ឌលវិទ្យាល័យអូរជ្រៅ៕
នៅបន្ទាយមានជ័យ ប្រលងឌីប្លូម ទាំងទឹកជំនន់ លិចមណ្ឌលប្រលង
